Civîna NATO û Pêşandanên Komunîstên Turkîye

Nivîskar: Xidir Uso

Dibên li Romê lîstik pir in, lê lîstikek heye ev pêncî sal in ku ji dika şanoyê daneketîye. Ew jî komunîstîya tirk ya dijî emperyalîzmê û NATO ye.

Li dijî lûtkeya endamên NATO ku wê li Turkiye li darbikeve, destekî nedîtî Partiya Komunîs a Turkîyê û hin rêxistinên qaşo dijî NATO ne derxistin kolanan.

Hêza ku vana derdixe kolanan, gelek armancên wê hene.

Pêşî jibo dewleta tirk li dijî komunîstan û antî emperyalîstan bi “biryar ditêkoşe”, alîkariya endamên NATO ya lojîstîk, leşkerî û ekonomîk bistîne. Jibo sûcê xwe yê gemaroya NATO li dijî Rûsya û Îran daniye ku îhlal dike piştguh bixe.

Li Başûr, Rojava yan nav xwe êrîş, dagîrî û sûcên li dijî Kurdan dike, van welatan wek heta niha çavê xwe jê re bigire.

Xwediyê vê dewletê biryar dabin ku êdî Tirkîye bi vê hikumet û siyasetê nameşe, pêşî tişta bihizirin derbek leşkerî ye. Jibo derba leşkerî çêkin, rêxistin û partiyên ji alî elemanê dewletê hatine avakirin û rêvebirin, wê têxin çalakiyên pevçûn, şêlandin û kuştinan. Wê “Komunîst” û “Musluman”an, Sûna û Elawîyan, Tirkperest û Kurdan bera hev bidin.

Komunîstên Tirk, durişmên mîna “Turkîyek Serbixwe! Kujer NATO! Turkiye ji NATO derê!” davêjin. Lê qet nabêjin Turkiye kê avakiriye, li ku avabûye û çawa avabûye!? Bi hevaltî û piştgiriya heman emperyalîstan, çawa Enedol û Kurdistanê bi zilm û zordarî, îşkence û qetlîaman dagîr kiriye, naynin bîra xwe.

Komunîstên Tirk, jibo dewleta tirk têkeve NATO li Kore, li hemberî tekoşîne miletekî mazlûm beşdarî şerê serwerîya Amerîka bû, kuştin û seqetbûna 20-30 hezar leşker nayê bîra wan.

Komunîstên Tirk, qetlîamên ku dewleta Turk bi piştgirîya dewletên emperyal û endamên NATO li dijî gelê Kurd pêkaniye, dagîrîya li Başûr û Rojavayê Kurdistanê, neanîne bîra xwe û rojekê bertek nîşan nedane.

Komunîstên Tirk, behsa kujerîya NATO dike; lê li dijî kujerîya Pûtîn û Îran û dewleta xwe, rojekê bertekek nîşan nedane! Di van pêşandanan de radihêjin alê Filîstîn, lê li dijî kujerîya dewleta xwe, carekê jî jibo Kurdan derneketine kolanan!

Evana tev rêdidin ku ev ne komunîst lê sosyal şoven in. Ew “komunîstê” dewleta tirk in. Ne tenê Komunîst, ”Ulkuci”yên tirkperest, Muslumanên tirkperest û kurdên çepgîr û rastgîr yên Turkîyeperest jî ji alî dewletê hatine birêxistinkirin û kengî ji dewletê re lazim be, dewlet wan derdixe kolanan. Û pêwîst be, bi vana sûcên giran û ne li rê dide kirin; wan bera hev dide û bi hev dide kuştin.

Helbet dewletên endamên NATO jî li gorî berjewendîyên xwe tevdigerin. Ji me çêtir zanin ku Turkîye li derve û li nava xwe çendîn sûcê mirovî û navnetewî dike, lê ji bo berjewendîyên xwe, ji tirkîye hesab naxwazin. Ev sed salin ku dewleta tirk gelek berjewendiyan pêşkêşî van dewletan dike.

Heta berjewendiyên wan xera nebe û bertekek xurt çênebe, ew dê vê tîyatroyê bi hevre temaşe biki…